أم صويلح: قل لي يا حلو منين الله جاباك؟.. مس الجرح قلبي من عذابك.. قولي وش شفت مني اذيه.. قلبك من ضخر ما حن عليا.. تررااام ترا تراا رم. سبيجه: منو الحلو يا أم صويلح؟! ليكون تقصدين الكأس!! أم صويلح: كل شي حلو. الكأس الحلو.. وعيالنا حلوين. سبيجه: تغيرين الموضوع.. أدري فيج.. أم صويلح: أي موضوع؟ سبيجه: الحلو إلي مس الجرح..الي يالسه تغني له! أم صويلح: ناظم الغزالي. سبيجه: تنكتين؟! أكيد تغنين حق راعي زنجفره نمره 21؟!! أم صويلح: شووه؟ سبيجه: زنجفره يعني فانيلا.. ونمره يعني رقم. أم صويلح: 21.. هيييي.. عموري.. الله يحفظه فديت عمره هو وربعه. فرحونا ربي يسعدهم. سبيجه: هو الحلو؟؟! أم صويلح: كل شي حلو.. أنا قلبي أخضر.. كل شي أشوفه حلو.. أبسألج سبيجوه الشيخ سلمان بن إبراهيم آل خليفة معرس؟! سبيجه: وإيشله هالسؤال؟! أم صويلح: ههاههاههااا.. سلامه تقول عنه مملوح الله يحفظه. قولي عاااد.. معرس ولا بعده. سبيجه: إذا سلامه تسأل.. . خبريها تخلص الجامعة وعقب بنشوف الموضوع. أم صويلح: تصدقين أن سلامه وأمها كانوا بييون امس عن طريق البر ويا خالها يحضرون المباراه.. لكن عقب عرفوا عن الزحمة غيرو رايهم.. زيين سوو. سبيجه: غميظه.. جان أحين مستانسين وياهم. أم صويلح: إلا قولي افتكينا من نحاستهم.. سبيجه: الله يفكنا من النحس.. عرسنا خليجي والمعرس خليجي والعروس الحلوة خذاها الجار الخليجي.. تستاهلون الكأس. أم صويلح: سبيجه: ماعليييج العمر طويل بإذن الله،، وبتاخذون الكأس.. وبتفرحون فرح ما بعده فرح. سبيجه: فرحنا ما بعده فرح بهالوجوه الطيبة.. الي تشرفنا بها في البحرين دار الزين. أم صويلح: ونحن فرحنا بضيافتكم.. وبشوفتكم.. وفرحنا بمنتخبنا ما ينوصف لأنه فريق الأحلام.. فريق الذهب.. فريق يستاهل أغنيله.. أنت عمري.